५ फागुन । तराई मधेसमा भएको लामो समयदेखिको बन्द, हडताल र नाकाबन्दीले सीमावर्ती भारतीय बजारसमेत प्रभावित भएको छ । मधेसी मोर्चाले गरेको बन्द हडतालको कारण सीमावर्ती भारतीय बजार जयनगरमा मात्रै २०० करोड बढी भारतीय रुपैयाँ बराबरको घाटा भएको व्यापारी बताउँछन् ।

धनुषा र सिरहाको थोक तथा खुद्रा व्यापारी र सेवाग्राहीको चाप रहने सो भारतीय बजारमा ७० प्रतिशत नेपाली ग्राहक खरिद गर्न आउने गरेका छन् । तर विगत पाँच महिनादेखि भएको बन्द हडतालको कारण व्यापार नराम्ररी प्रभावित हुन गएको जयनगर चेम्बर अफ कमर्सले जना

ठूलो सानो गरी करिब एक हजार व्यापारी रहेको सो बजारमा ग्राहकले मुख्यरुपमा कपडा, किराना सामान, कस्मेटिक, स्पेयर्स पार्टस खरिद गर्ने गरेका छन् । दैनिक दुई करोड ५० लाख भारतीय रुपैयाँको व्यापार हुने गरेको सो बजारमा अहिले लामो समयको बन्द हडताल खुलेपछि २० प्रतिशत मात्र व्यापार भइरहेको स्थानीय व्यापारीको भनाइ छ ।

करिब २०० वर्षको इतिहास बोकेको सो भारतीय बजार नेपाल भारतबीच रहेको वैवाहिक, सांस्कृतिक र सामाजिक सम्बन्धको कारण सिरहा र धनुषाबाट जाने ग्राहकको कारण सो बजार गुल्जार हुँदै गएको हो भने ग्राहक र व्यापारीबीच रहेको सुमधुर सम्बन्धको कारणसमेत फस्टाउँदै गएको छ ।

नेपाली बजारभन्दा भारतको जयनगर बजारमा सामानको मूल्य ३० देखि ४० प्रतिशत कम हुने गरेकाले नेपालीहरु सो बजारतर्फ आकर्षित हुने गरेको जयनगर चेम्बर्स अफ कमर्सका महासचिव अनिलकुमार बैलोरियाले बताउनुभयो ।स्रोत;रासस